الله يهدي من غرامه على شــات ...؟؟؟

الله يهدي من غرامه على شات
والا على بسْت(ن) وشاشة محطّه

والله يهدي من يدوّر علاقات
ورى نفوس(ن) في ضماير مُحطّه

بنت(ن) تميّلح في صورها اثارات
صورة غزال وصورة الوجه بطّه

تعشق حقير(ن) في كلامه مروات
السوبر أخضر والزخاريف خَطّه

كنّج وشجاع(ن) في كثير العبارات
والا الحقيقة شاري الثوب قطّه

لا لا تغرك بين الاقواس (نكّات)
هذي على قول الحقيرين خُطّه

عزّي وشاني شامخ(ن) بالمنيفات
ماهي زياده كمّ نقطه ونقّطه

بعض الأوادم لا عنا لي مسافات
وربي قليله في عيوني أحطّه

وبعض الخلايق والوجيه الغبيرات
والله خساره لو أعشّيه شطّه

يا بنت ياللي تعشقين الطويلات
بعض الحكي عيب(ن) علينا نقطّه

لا تسأليني عن مكان الشريفات
أخاف هرجي لايجي فيه غلّطه

إليا سألتي عن طبوع العفيفات
فبنت(ن) تهجّد ليلها ما تغطّه

وإليا نصحتك خوذي العلم باسكات
واخذي كلامي وآخر اللي أخطّه

منهو يحبك أو يعزك على شات
وربي مقامك تحت رجله يحطّه

هذا جوابي وبصريح العبارات
ياكم عذرى راحت بسببّ غلطه